ظرفاء الشكابة شاع الدين

اكتب هنا بعض ماقيل علي لسان الظرفاء من قريتي وأتمني أن تتحفونا بكل ماهو جميل للشخصيلت المرحة ,
أذكر عندما كنا صغارا كان عمنا المرحوم أمحمد ود يوسف والد الضو محمد يوسف والاستاذ يوسف محمد يوسف كنا نسمع عن حكاوية وردو الما بتلفت ليو ومن حكاويو
قال لي واحدة من بناتو يابت جيبي لي موية وكان جاي من الحواشات البت فاتت غطست ماجابت الموية الا بعد ما العطش عصرو شديد وجابتا حارة وفي كورة , اول ماشافا جايا عليو بالكورة قال ليها هابتي وديها لي فوق التقنت عشان اشربا هناك.
وكذلك أذكر كنا قاعدين مع نزار الباشا في دكان والباشا العريق وكان معانا عمنا احمد بابكر بيونس معانا ففي شافع بكورك لي صاحبو وقال ليو (ورحكاكا) فرد عليو الدكتور بعد ماناداو قال ليو عرفنا( ورح ) (كاكا ) دي شنو
وبرضو بذكر عمنا عبد الرحمن ود مدني الذي رحل عنا الشهر الفايت جاء من الحواشة في رابع بيت عز الضهر والسموم كعبة شديد وحاني علي الحمار وداير يزقيو موية كب الموية من البرميل وهاك ياصفير للحمار عشان يشرب , الحمار حالف مايدنقر راسو ويشرب , نادي بتو باخر نفس قال ليها جيبي للحمار دة قالب تلج
نرجع لي امحمد وديوسف (في رمضان يوسف ولدو بيصلي بيهم المغرب وعمنا عاجباو حكاية الاقامة وسمع اللة لمن حمدو فقام يوسف نسا وقال سمع اللة لمن حمدو ودي طبعا حصريا علي عمك فقال ليو هاولدي انا اقول ليك شنو)

الاخ مجاهد ابوجكة

السلام وعليكم ورحمه الله وبركاتة

الحقيقة انا معجب جداً بكتاباتك الجميلة والاهم من ذلك كيفية إختيارك للمواضيع الشيقة المتنوعه
التي هى بمثابة نافذة نطل بها علي قريتنا الشكابة وذكرياتها الجميلة،،،،،

لكل إنسان شخصية مستقلة يتميز بها عن الشخصيات الأخرى ، و لكل فرد نمط ٌخاص ، و منهج مستقل بذاته عرف عنه و اشتهر به ، فتجد أن بعض الشخصيات قد اشتهر بالظرافة و المرح ، و خفة الدم ، حتى لو أنه قال لك ( كيف حالك ) ، لاستلقيت على ظهرك ضحكا ، وبالشكابة العديد من تلك الشخصيات تتمني ان تكون جوارهم ولا تفارقهم وساذكر بعض من هذه الشخصيات علي سبيل المثال وليس الحصر ....
بشري الامين (حبيب) ، كمال عبدالماجد (كيلي) ، الامين كُرم ، علي حمد علي ، عبدو الشايقي ،
بله البشير ، عمنا التجاني البشري ، عمنا محمد حاج النيل ، عمنا رحمة الله الشيخ .....الخ،،،،

ياريت تتحفونا ببعض من ابداعاتهم في هذا المنتدي
ويا مجاهد متابعين معاك إن شاءالله

خالص تحياتي ،،،،
منذر احمد بابكر

الاخ أس 10 منذر أحمد بابكر لك التحية والتجلا , أخي لابد لهذا المنتدي من التوسع ولن يتوسع الا بجهودنا كافة لذا لابد من العمل حتي نرتقي بهذا المنتدي وأيدك علي أيدي علي أيد كل الشباب نودي المنتدي لي قدام والنصيحة ليك ياللة المنتدي بيربط الناس مع بعض , والحاصل هسي دي يامنذر دليل عملي يعني (الشكاكيب الفي الرياض , والفي جدة , والفي الخرطوم , والفي مدني , والفي أمريكا)
كلون كل يوم بيتونسو مع بعض وبتبادلو الاراء . ويلا لي قدام